En Direct | Premye Okazyon | 13 Mai 2021

Premye Okazyon | 13 Mai 2021
Présentation : Roberde CÉLINÉ (Bob C.), Dieuseul GUERRIER et Pierre-Renel RENÉ.

Les titres :
1- « La profession infirmière, une voie faite pour diriger une vision des soins de demain », se sou tèm sa-a jounen entènasyonal enfimye ak enfimye yo selebre ane sa-a. Pou make jounen sa-a, Ofis Asirans Aksidan Travay, Maladi ak Matènite (OFATMA), òganize yon mès aksyon degras, kote plizyè dizèn enfimyè ak enfimye metre ak anplwaye lopital la-a te patisipe.
Nan diskou li nan sikonstans la-a, direktè enstitisyon an, doktè Aggabus JOSEPH fè konnen dat 12 me-a, se yon dat pou mete an valè epi apresye travay enfimyè ak enfimye yo, pandanl presize, pwofesyonèl sante sa yo jwe yon wòl enpòtan nan mond medikal la-a.

2- Pandan tan sa-a, sendika pèsonèl enfimye yo (SPI), nan okazyon an, denonse fenomèn kidnapin ak ensekirite-a ki pa sispan mete dlo nan je popilasyon ayisyèn nan, epi anpeche yo fonksyone kòm sa dwa.
Enfimyè yo nan sans sa menase kanpe travay si otorite yo pa pran dispozisyon pou mete bout nan ensekirite-a.

3- Ekonomi ayisyèn ap travèse yon enpas trè grav, dapre ekonomis Etzer EMILE lanse yon rèl bay enstans konsène yo. Pou jistifye sal di-a, ekonomis la-a, pran kòm egzanp, defisi komèsyal ak bidjetè, chomaj mete sou mwens pase 3.3% kwasans, ki se pi gwo rekò depi apre tranbleman tè 12 janvye 2010.
Pi lwen ekonomis Etzer EMILE atire atansyon popilasyon an sou yon aspè biza, « Kote sistèm bankè-a an bòn sante, alòske dola ameriken an kontinye ap pran pye sou goud la-a. »

4- Se ak gaz lakrimojèn lapolis kraze sit-in konbit òganizasyon politik, sendikal ak popilè-a òganize mekredi 12 me-a devan anbasad ameriken nan taba.
Atravè mounvman sa-a, manm konbit yo te vle adrese yo ak prezidan ameriken an, Joe BIDEN ki kontinye ap sipòte Jovenel MOISE sou pouvwa-a, malgre popilasyon an pa menm ka respire anba lavi chè, ensekirite ak zak kidnapping yo ki pa sispann vale teren nan kat kwen peyi-a.

5- Ministè komès ak endistri pa retrase òkenn tranzaksyon antyrepriz kap evolye nan sektè tekstil la-a. Minis komès la-a, Jonas COFFY eksprime preyokipasyonl fas ak sitiyasyon sa-a.
Responsab MCI rankontre Asosiyasyon Endistri Dayiti, pou rive jwenn bon jan enfòmasyon pa rapò ak sitiyasyon sa-a. Jonas COFFY anonse dezòmè, tout antrepriz soutretans genyen obligasyon pou soumèt tout atestasyon tranzaksyon chanj yo, pou pèmèt yo rive jwenn sètifika kap pèmèt yo elijib pou egzonerasyon.

6- Finalman, leta ayisyen vle kontwole enpòtasyon an nan peyi-a. « Soti depi nan pri-a, jis rive nan kalite, enspektè ministè komès yo ap gen pou verifye tout pwodwi ki rantre nan peyi-a. » Sin kwè minis komès ak endistri-a.
Jonas COFFY anonse, echantiyon tout pwodwi kap rantre nan peyi-a ap gen pou ale nan laboratwa pou egzamen, pandanl egzige enpòtatè yo tou, pou soumèt tout atestasyon ki gen rapò ak tranzaksyon chanj ki fèt sou mache-a.

7- Mèt Moise DERESTIN se nouvo komisè gouvenman kip ran tèt pakè Senmak la-a. Li ran plase nan pòt sa-a, mèt Hugues SYLVAIN ki nome kòm jij nan kou dapèl Gonayiv. Se madi 11 me 2021 an, seremoni enstalasyon an fèt.
Nan diskou sikonstans li, nouvo chèf pakè senmak la pwomèt poul kontinye sou menm lanse predesesèl nan mitan lod onivo jiridiksyon.

8- Nan yon kontèks kote zak vyolans ak ensekirite-a pa sispann mete dlo nan je popilasyon an ki déjà pa konnen ki sen pou yo rele, Komisyon nasyonal dezameman demantèlman reyinsèsyon ak rediksyon vyolans an ayiti, demare jounen mèkredi 12 me 2021 a, ak yon atelye 3 jounen sou vyolans kominotè.
Komisè CNDDR yo ki montre kòman gwoup ame yo pa sispann miltipliye, swete otorite konsène yo pran tout dispozisyon pou mete an aplikasyon dokiman kap genyen pou soti apre 3 jounen atelye sa-a.

Réalisation & mise en ligne : Mysuel THIMOTÉE