Premye Okazyon | 24 Janvier 2023
Présentation : Dieuseul GUERRIER, Pierre Renel RENÉ (PRR), Lydie ALEXANDRE & Johnny FERDINAND.
Météo avec Chrisnette SAINT-GEORGES.
Kijan Potoprens leve maten an? avec Mackenson RÉMY (4*4).
Titres
1- Nan yon kominike li voye bay konsèy sekirite a, sekretè jeneral nasyon zini yo, Antonio Guterres, fè konnen li ijan pou gen yon fòs sekirite entènasyonal ki deplwaye an Ayiti pou ede konbat gang yo, ede peyi a pran wout demokrasi, yon fason pou jwenn yon solisyon nan kriz la. Nan kad yon pledwaye an favè yon pwogram pou apiye polis nasyonal la, Jiskaprezan PNUD gen pwomès don sèlman pou yon valè 17,75 milyon dola sou 28 milyon dola y ap bezwen, daprè sekretè jeneral nasyon zini yo.
2.- 2 moun mouri, plizyè lòt blese ak bal anpil kay boule: se bilan pwovizwa atak bandi ak zam fè nan katriyèm seksyon Bellevue la Montagne vandredi 21 janvye pase a, daprè Atanase Jean, Azèk katriyèm seksyon kominal Bellevue la Montagne komin Petyonvil. Selon Azèk la abitan nan divès lokalite tankou Adrien, ka François, Divier kouri kite kay yo epi ap dòmi nan raje. Li fè apèl ak èd leta santral pou asiste viktim yo.
3.- Komisè prensipal Petyonvil la, Aladin Jean-Louis fè konnen tout bagay rantre nan nòmal nan komisarya komin sa aprè gwo atak ak zam manm gang Vitelhomme Innocent fè week-end pase a kote 3 polisye mouri, youn blese ak yon lòt disparet. Responsab komisarya a deplore gwo ensidan sa ki rive manm enstitisyon PNH la. Li pwofite tou mande tout polisye pou fè tèt kole nan lide pou pote solidarite yo ak fanmi polisye viktim yo. Toutfwa nou aprann polisye yo ki toujou fache apre asasina kolèg yo pat resevwa jounen lendi a yon delegasyon DGPNH kite vin chita pale ak yo.
4.- Lapolis nasyonal d Ayiti demare lane 2023 nan lapenn. Anviwon yon dizèn polisye deja mouri pandan mwa janvye a. Yon sitiyasyon kolektif Defenseur Plus deplore. Oganizasyon k ap defann dwa moun nan kondane atak bandi manm gang Vitelhomme yo nan petyonvil, vandredi pase a, kote 4 polisye mouri. Kolektif la kritike silans men tou lante wo eta majo lapolis la ki sanble bay bandi yo legen.
5.- Prèske nan tout peyi a, se gwo foul moun devan biwo ONI, DGI ak imigrasyon kote chak moun bezwen dokiman pou al fè paspo yo, depi lansman pwogram migran prezidan ameriken an. Devan direksyon jeneral enpo a nan komin kafou, yo se plizyè santèn moun ki chak jou ap vin achte tenb paspò yo. Anpil elèv ki prezan nan liy pou al chèche retire dokiman sa fe konnen se yon chans yo pa vle rate.
6.- Gad kot ameriken kenbe yon bato ki t ap transpòte anviwon 400 ayisyen dimanch 22 janvye a, toupre yon zile izole Bahamas. Daprè yon kominike ministè imigrasyon Bahamas yo kenbe 396 migran ilegal ki t ap soti Ayiti, nan zòn Cay sal bank ,yon zile izole nan nò peyi a, yo t ap pran direksyon Florida. Alòske otorite ameriken yo dekouraje vwayaj ilegal sou lanmè, Ayisyen yo kontinye pran lanmè pou rantre sou teritwa ameriken an.
7.- 2 prezime bandi ki rele Edwige Joseph ak Watson Vilmont mouri nan echanj kout zam ak lapolis dimanch pase a. Prezime bandi yo ki gen yon revolvè nan men yo te atake yon patwouy brigad entevansyon komisarya Pòtoprens, nan zon chrits-roi.
Productions : Jean-Claude DOLCÉ.
Coordination : Peterson LUXAMA.
Rédaction : Dieuseul GUERRIER.
Réalisation & mise en ligne : Mysuel THIMOTÉE.