En Direct | Premye Okazyon | 1er Octobre 2021

Premye Okazyon | 1er Octobre 2021
Présentation : Roberde CÉLINÉ (Bob C.), Dieuseul GUERRIER & Pierre-Renel RENÉ (PRR).
Météo avec Chrisnette SAINT-GEORGES.
Kijan Potoprens leve maten an? avec Mackenson RÉMY (4*4).

Les titres
1.- 30 septanm 1991-30 septanm 2021, 30 lane depi koudeta militè kont prezidan epòk la-a, Jean-Bertrand ARISTIDE.
Pou komemore dat sa-a, nan yon konferans pou laprès, Fanmi Lavalas atravè kòdonatris jeneral li, doktè Maryse NARCISSE di li regret plis pase 5 mil sitwayen ak sitwayèn pèzib fòs femwa yo te masakre nan moman sa-a.
Dapre Maryse NARCISSE, se koudeta sa ki frennen pwosesis devlòpman Ayiti, kote peyi-a, jiska prezan kontinye ap peye po kase-a.

2.-11 moun mouri, prèske yon dizèn lòt blese nan Ravin pentad, dapre Sant Analiz ak Rechèch nan zafè dwa moun, (CARDH) ki egzije bon jan eksplikasyon bò kote otorite polisyè ak jidisyè yo.
Nan rapò yo drese sou evènman sa ki pase nan ang Avenue John Brown ak Rue Nord Alexis, madi 21 septanm 2021, CARDH pale de sa li rele turi ak egzekisyon somèr.
Oganizasyon dwa moun nan pi lwen soulinye te menm genyen premeditasyon epi itilizasyon fòs ki pa pwopòsyonèl nan kad operasyon sa

3.- Seri odisyon sou asasina ansyen prezidan Jovenel MOISE yo ap rapouswiv. Jij enstriksyon Gary ORELIEN tande jedi a komisè Pierre Osman LEANDRE, kite arete nan kad dosye sa-a,li te responsab inite sekirite prezidansyel la(USP) .
Avoka enkilpe-a, mèt Eugene PIERRE-LOUIS Ki deja depoze rekèt an men leve dekwou, fè konnen odisyon an te byen déwoule, menm si li pat an mezi pou founi twòp detay.
Alòske li raple enstriksyon an dwe rete sekrè, avoka sèlman fè konnen kliyan li an te reponn tout kesyon yo kòm sa dwa.

4.- Soti dimanch 19 pou rive mèkredi 29 septanm 2021 an, Ofis Nasyonal Migrasyon an akeyi nan ayopò entènasyonal Toussaint LOUVERTURE, ak kap Ayisyen, yon total 5 405 moun ki depòte soti nan peyi etazini, pami yo 2732 gason, 1435 fanm ak 1238 timoun, dapre direktè jeneral Ofis Nasyonal Migrasyon an, Jean Negot Bonheur DELVA.
Seri depòtasyon yo ap rapouswiv, dapre direktè ONM nan ki soulinye, genyen nou kòmanse resevwa depòte soti nan peyi Mexique, apati mèkredi 29 septanm nan. Jean Negot Bonheur DELVA raple tou, jodi-a ak demen ONM ap genyen pou revevwa vòl ki soti nan peyi Bahamas

5.- « Menm peyi etazini pa an mezi pou di konbyen migran ayisyen kap genyen pou rive sou teritwa nasyonal la-a. » Dapre chèf misyon Oganizasyon Entènasyonal Migrasyon an Ayiti an.
Toutfwa-a, Giuseppe LOPRETE fè konnen OIM ak ONM ap prepare yo an konsekans, parapò ak kantite migran yo ta dwe rantre nan peyi-a.
Alòske li pa an mezi pou konfime don 5 milyon dola ameriken etazini ta dwe bay pou migran yo, Giuseppe LOPRETE menm pale de mwayen limite pou ta resevwa kantite migran ki ta dwe rantre soti nan peyi Mexique, Bahamas, Tucks and Caicos ak Colombie.

6.- dwayen tribinal sivil potoprens la ,met bernard Sainvil leve mezi entediksyon pou kite peyi a lajistis te pran kont prezidan otopwoklame opozisyon an ,met Joseph Mecene Jean –Louis 12 fevriye pase a .se yon etap enpotan nan kad aplikasyon ako 11 septanm nan ,dapre pot pawol sekte demokratik la,Met Andre Michel .

Rédaction : Ganito FRANCOIS
Réalisation & mise en Ligne : Mysuel THIMOTÉE