En Direct | Premye Okazyon | 20 Mai 2021

Premye Okazyon | 20 Mai 2021
Présentation : Roberde CÉLINÉ (Bob C.), Dieuseul GUERRIER & Pierre-Renel RENÉ (PRR).
Météo avec Chrisnette SAINT-GEORGES
Kijan Potoprens leve pou maten an? : Mackenson RÉMY (4*4)

Les titres :
1- Otorite yo kap rantre tèt bese nan yon referandòm dèyè do lalwa-a, Enstalasyon yon Konsèy Elektoral Pwovizwa ki pa prete sèman devan lakou kasasyon, jan manman lwa peyi-a mande sa-a. Yon seri siy, ki dapre batonyè lòd avoka pòtoprens la-a, montre aklè, etablisman yon rejim totalitè nan peyi-a.
Marie Suzy LEGROS ki fè deklarasyon sa-a nan okazyon fèt Saint-Yves, ki se patwon avoka yo, denonse tou iresponsabilite otorite konsène yo fas ak konstitisyon ayisyèn an ki trase kòman yo dwe chanje manman lwa peyi-a.

2- Prezantasyon mèkredi 19 me 2021 an, nouvèl vèsyon avan pwojè nouvo konstitisyon an. Daprè Louineau PIERRE, dokiman sa-a pran an konsiderasyon, ansanm pwopozisyon ki te fèt pandan chita pale ak reprezantan plizyè sektè ak popilasyon nan plizyè depatman andan peyi-a.
Toutfwa-a, Louineau PIERRE fè konnen rejim politik la pa chanje.

3- Pandan sa-a, plizyè oganizasyon politik nan opozisyon an kontinye ap denonse pwojè referandòm Jovenel MOÏSE la ki vize chanje manman lwa peyi a. Daprè òganizasyon sosyopolitik VIV AYITI li pa nòmal pou ansyen patwon agritrans lan ap gaspiye lajan trezò piblik la nan yon pwojè referandòm ak eleksyon tèt anba, pandan majorite popilasyon an ap viv nan mizè.
Rony TIMOTHÉE, pòt pawol VIV AYITI di yo rete fèm sou pozisyon yo, envite popilasyon an mobilize nan batay la pou fè echèk ak volonte Jovenel MOÏSE genyen pou mennen peyi-a sou chimen diktadi.

4- Paralèlman, Muraud Pierre ANDRE reprezantan komisyon kap defann nouvo keperativ Balatibonit ki jwenn sipò finansye nan men pouvwa egzekitif la di dakò pou prezidan Jovenel MOISE dote peyi-a yon nouvèl konstitisyon peyi-a.
Nan yon konferans yo bay, madi 18 me 2021, nan okazyon 218 lane drapo nasyonal la. Nan sans sa-a, li mande opozisyon politik pran chimen eleksyon si toutfwa yo vle demokrasi avanse nan peyia.

5- Jedi 20 me 2021 an, se dat divès òganizasyon nan sosyete sivil la-a, akl avoka Caleb JEAN BAPTISTE, Madame Magalie LACROIX, Angelot SAINT-LOT kenbe òganizasyon sit-in devan lakou dapèl pòrtoprens.
Atravè mouvman sa-a, responsab yo denonse trennen pye otorite jidisyè yo nan dosye prizonye politik yo, pami yo, ansyen depite Arnel BELIZAIRE ak ansyen pòt pawòl sendika polis nasyonal la-a, Abelson GROS-NEGRE kap kwoupi dèyè bawo nan do lalwa-a.

6- Pwofesè nan lise Alexandre PETION yo fè yon kanpe travay mèkredi 19 me 2021 an, pou kontinye egzije otorite konsène mete sekirite nan anviwònman lise petyon. Yo denonse divès fòm presyon sikololojik pwofesè, elèv, ak tout lòt muon kap frekante espas la-a pa sispann sibi chak jou BONDYE mete, san konte sila yo ki viktim anba bal bandi.

7- Gwoup kap apiye rapatriye ak Refijye yo (GARR), eksprime preyokipasyon yo fas ak desizyon ortotite dominikèn yo pran pou monte yon miray sou fwantyè ant 2 peyi-a. Yon desizyon ki pran nan lide pou bese kantite migran ayisyen kap travèse fwontyè-a pou rantre nan terititwa vwazen san papye ak kontrebann, dapre Joseph Mike LYSIAS ki kwè toutfwa, konstriksyon miray sa-a pa pi bon desizyon pou batay kont fenomèn sa-a.
AYITI-Saint-Yves/ Marie Suzy LEGROS

🖥 Réalisation & Mise en ligne : Mysuel THIMOTÉE